Heyefnagreiningar
Fóðurefnagreiningar eru mikilvægt hjálpartæki í búskap og forsenda þess að rétt sé staðið að fóðrun gripa til hámarksafurða. Færst hefur í vöxt að bændur taki heysýni við hirðingu en einnig er hægt að taka sýni af verkuðu heyi, úr hlöðum eða rúllum.
Bændum á svæði Búgarðs gefst kostur á því að skrá sig á heysýnalista og fá þá senda poka og merkimiða vegna hirðingarsýna í upphafi sláttar. Einnig gefst kostur á því að láta taka borsýni úr rúllum eða hlöðum.
Heyefnagreiningar fara fram í samvinnu við Landbúnaðarháskóla Íslands. Skila þarf sýnum í Búgarð en þar eru þau þurrkuð og möluð og send LBHÍ til efnagreiningar. Niðurstöðunum er síðan skilað til bænda með viðeigandi leiðbeiningum.
Jarðvegsefnagreiningar
Jarðvegssýnataka fer fram á starfssvæði Búgarðs í september og október. Árið 2006 lauk skipulagðri jarðvegssýnatöku á Norðausturlandi og ákveðið var að gera hlé á sýnatöku áður en hafist verður handa við næstu umferð.
Bændur sem óska eftir jarðvegssýnatöku geta pantað hana á skrifstofu Búgarðs í síma 460-4477 eða netfanginu ib(hjá)bugardur.is
Jarðvegssýnin eru meðhöndluð og efnagreind á rannsóknarstofu Búgarðs eða send til greiningar á Hvanneyri.